الله الله يا الطالب
اللَّه غالب يا الطّالب
هاد الزّمان وَلّى غلّاب
الفاهم وَلّى كَيْسَكّت
والكذّاب وَلّى خْطّاب
لي قالْ الحقّ كَيْتْعاقب
ولي باع الذِّمّة مَحبوب
الفهّامة بينا غايْبَة
والْحِكمة وْلّاتْ مكتوب
لي شَدّو الحُكم غْنيمة
والشّعب معاهم مَحْسوب
كلّ نهار كَيْزيدو مصيبة
وإحْنا ساكتين بلا عْتاب
بايعين الخوف فالدّريبة
وشارِين الْوهم بالأسباب
كلّ ثورة وراها اللّعيبة
وكلّ تِبّاع كَيْجيه نَصّاب
خْلاو البْصير فالعْجاجة
والمُنافق وَلّى دليل
كلّ كلمة صادقة مْزالْها
كَيْتْحسب ليها التأويل
فين الصّح فهاد الحكاية
كُلشي كَيْدور بالتّبديل
والّي بْغى يعيش بكرامة
يلبس جِلد التّمْساح ثقيل
النّية وْلاتْ مْتَوَحِّشَة
كَيْتْخاف من ظِلّها تمِيل
والّي كَيْبكي مع الخايْبة
هو اللّي كِينال التّهْليل
السّكوت وَلّى هو السّلاح
والصّبر تْقَلّب للجراح
ما بْقى لا ضو لا مِفْتاح
غير صَهْد الواقع والرّياح
بقلم الزجال حسن السريفي
ليست هناك تعليقات:
إرسال تعليق