دنيا زمان
مش هيا دي الدنيا
ولا الناس ولا الشعوب والحكام
الدنيا كانت حلوه بتشع نور
والنفوس راضيه هاديه جميله
بتحب الخير للغير
والحياه بسيطه والكل عايش
معاه أو ممعاهوش راضي مبسوط
والقلوب نورها بيزغلل العيون
واللسان بينقط سكر وكلام موزون
والناس في رباط في الفرح والحزن
مع بعض والايادي متشابكين
ورمضان كان شهر سعاده
والعيد يهل علينا بفرح جديد
لا تعرف غني من فقير
والدوار مجمع الحبايب صغير وكبير
والعيله كانت عيله كبيرها له مقامه
واحترامه هو المُربي والمدرسه هو المدير
اتغير الحال واتبدل ومات الضمير
الحراره زادت ونور القلوب إنطفى
والحياه بقت صعبه
اللي معاه عايش ويموت الفقير
ماهي بقت لعبة فلوس
اللي معاه الناس على إديه تجري تبوس
الله يلعنك يادي الفلوس
فرقتي الاحبه وغيرتي النفوس
والكبير راحت هيبته والكل عليه بيدوس
واتفرقت العيله واتغيرت الحيطان
حتى الحصيره عاشت عليها الجرزان
عيني عليكي يادنيا كل حاجه اتغيرت
والحب في القلوب مالوش مكان
سكن مكانه الغل والحقد والكره
وهوى النفس ماهو بقى سكن الشيطان
اعوذ بالله منك يادنيا
إمتى تحني علينا وترجع ايام زمان
ابراهيم محمد آدم
ليست هناك تعليقات:
إرسال تعليق