........((( نسيت يا صاحبي ))) .......
قوام يا صاحبي نسيت الليالي
نسيت اللي كان وصحبة زمان
نسيت لما كنا بنمشي ب أمان
و نلعب سوي في كل مكان
نسيت لما كنا ب نقسم ما بينا
اللقمه ب موده و حب و حنان
و تحضن قلوبنا بعض كمان
و نحكي اللي بينا و نفرح قوي
نسيت طب كلامنا وقت الرجوع
و حتي دموعنا وقت الوداع
و قلوبنا ب تمسح بقايا الاسي
و تحضن عيونا أماني العشا
نسيت يا صديقي ليالي الصبا
و فرحة نجاحنا نهاية السنه
و لمة حارتنا و فرحة جارتنا
و عشق الطفوله و عهد الوفا
نسيت ليه ياصاحبي قوام كل ده
نسيت الاماني في بحر الندي
و سرد حكاوي ف ليل الدفا
و ضحك القهاوي ف عز الشتا
نسيت ذكرياتنا و عشق البنات
و وقفتنا بره كمان ب الساعات
نغازل ف مي و شمس و آيات
و نرمي الأماني ف بحر الآهات
نسيت ياصاحبي صديقنا اللي مات
ف عز الصبا قوام من سكات
و فاتنا سكاري ف لحظة سبات
و خلي قلوبنا تنزف كاسات
نسيت لين سافرنا بره البلاد
و فتنا الحبايب و فتنا الولاد
و لما رجعنا نسينا الميعاد
شربنا دموع الفراق و العناد
نسيت يا صاحبي قوام كل ده
نسيت لهفة أمك و فرحة أبوك
نسيت دعوة أمك وخالتك و أبوك
نسيت وعد خالتك لاختك و أبوك
و زفة حبيبتك ف يوم اللقا
و عينك ب تبكي دموع م البكا
و قلبك ب يبكي و يرفض يبيع
و يلعن ليالي قضاها ف خضوع
نسيت بس إيه ولا إيه و لا إيه
نسيت عمر عدي بنضحك عليه
و غدر الليالي و ضحك السنين
نسيت الحبايب نسيت هم فين
كلمات الاديب الشاعر السيد علي القن
ليست هناك تعليقات:
إرسال تعليق