زجل بالعامية السورية
حطي راسك ع زندي
خليني نام
عملنلك زندي مخدة
وجفوني حرام
من هاللحظة مابدي
طول الأيام
غير تبقي انتي حدي
والباقي وهام
***
ياما سهرت الليالي
تحت الشباك
أقعد وحدي لحالي
من دون حراك
أنطر تَ تطلي قبالي
وأرمي لشباك
اتخبى خلف خيالي
انسج أحلام
***
وبذكر بيوم الجمعة
بآخر آيار
لما رحتي ع النبعة
تعبي لجرار
كانت شمسا مرتفعا
والدنيا نار
الشمس ونارك مجتمعة
والشوق كوام
***
ولما شفتك تتمشي
بين الوردات
طلعو عيوني من وشي
أسرق نظرات
وبإيدك صرتي تكشي
شوية نحلات
عخدودك عملو العشة
وعاشو بسلام
***
وهام: أوهام
كوام: كميات كبيرة من الشيء
تكشي: تشيح بيدها
العشة: بيت
محمد حبيب يونس سورية
ليست هناك تعليقات:
إرسال تعليق