ويكبر الحلم جوانا
................... نص باللغة العامية المصرية
البنت ....
البنت
إللي رسمتها ع الحيطة زمان
بفيونكة
وسرحت شعرها بطبشور ملون
مش بمشطة
تكبر كل يوم قدام عنيا
لما أبص عليها
آلاقي فستانها بيصغر
ويكبر الحلم جوانا
ماشية تتعايق قدامي
ظهرت تاني ف أحلامي
بس من غير فيونكة
لافة شعرها بطرحة
لابسة فستان آخر موضة
ضحكتها ..
ضحكتها هي هي
نفس الضحكة
صوتها.
صوتها هو هو
نفس صوتها الأولاني
نظرتها .
نظرتها سحر
وبسمتها .
بسمة طايرة
ف الهوا
تحضن عنيا
................
بقلم " جمعه عبد المنعم يونس "
مصر العربية في 17 مايو 2025
ليست هناك تعليقات:
إرسال تعليق