كلمات شاعر بني هاشم
الشاعر صبرى عبد الواحد الحساني
معلم سابق بمدرسة الإصلاح الزراعي بنجع حمادى محافظة قنا جمهورية مصر العربية
عامل نفسه صايم
جايب فى سيرة الناس
ولسانه ما عاتق حد
بيقول كلام معيوب
فيه غلط وفيه الجد
وان حد قاله ده عيب
يقول ما بينا ود
وعامل نفسه صايم
مسكين جعان وعطشان
ده بس اللى واخده من صيامه
وفطور وسحور مع لمه
ده كله أفسده بكلامه
لسانك حصانك صونه
هيرميك لو ما مسكتش لجامه
وعامل نفسه صايم
بعنيه بياكل الناس
إللى رايحه واللى جايه
دى طويله ودى قصيره
دى كبيره ودى صبيه
السمره من البيضه احلا
نفسى اضمهاباديه
ما عاتقش حد واصل
فقيره أو غنيه
دى لابسه بنطلون
ودى بتحجيبه مدليه
دى جسمها مليان
ودى جسمها مخبيه
دى بعنيها بتقول كلام
ودى عينيها بتضحك ليه
وعامل نفسه صايم
يا اخى حرام كفايه
صيامك ضاع عليك
بلسانك وكلامك
والنظره من عنيك
صيامك جوع وعطش
وصواب ما فيش لديك
فى البيت مشغل اغانى
وعلى الطبل البلدى بيرقص
ولو شاف اثنين حبايب
بينهم بالفتنه ينغص
عامل زى الحمار
ما فالحش غير أنه يرفص
وعامل نفسه صايم
نهاره كله نوم
ما يقوم غير على الفطار
لو كان فى الحر تكييف
وفى البرد بيقيد نار
واهو يوم قال ويعدى
فطور وبين اسحار
عايب فى صاحبه وجاره
ومن الكل واخد انذار
لا حد فى يوم جاله
ولا دخل ليه باب دار
وزكاته ما بيديهاش
ويقول عيالى كتار
وعامل نفسه صايم
لا فى يوم مسكله مصحف
أو قرأ فى يوم ايه
وتقوله ليه كده
يطلعلك بمية حكايه
صايم جعان عطشان
وصداع ملازم معايه
وريقى والله ناشف
وكلامه زى الولاية
وعامل نفسه صايم
ماسايبش حد فى حاله
كبير كان أو صغير
كل ما تقوله عيب
يقولك أنا مش هتغير
صيامك كده يا مسكين
فى السما غبار اتطير
اللهم تقبل صيامنا وصلاتنا واكفنا شر ما لا نطيق شره
اللهم ابعد عنا كل ما ىؤذينا زاعطنا من كرمك وجودك ونعمك حتى ترضينا أمين أمين أمين يارب العالمين
اخوكم/ صبرى عبد الواحد الحساني
معلم بمدرسة الإصلاح الزراعي بنجع حمادى
ليست هناك تعليقات:
إرسال تعليق